Markvörðurinn Grétar Ari Guðjónsson verður í hóp í kvöld í fyrsta sinn hjá franska liðinu Nice þegar liðið fær lið Strasbourg í heimsókn en liðin leika í frönsku 2. deildinni.
Grétar Ari gekk til liðs við Nice frá Haukum í sumar en var svo óheppinn að meiðast á ökkla og hefur af þeim sökum verið frá keppni eins og kom fram á handbolti.is á dögunum. Grétar Ari er á batavegi og staðfesti við handbolta.is að hann verði í leikmannahópi liðsins í kvöld.
„Þetta er að batna. Ég finn fyrir meira öryggi með hverjum degi sem líður en það tekur væntanlega einhvern tíma til viðbótar að verða alveg verkjalaus. Eins og er get ég spilað,“ sagði Grétar Ari m.a. þegar handbolti.is var í sambandi við hann í morgun.
Nice tapaði naumlega, 30:29, fyrir Cherbourg í fyrstu umferð 2. deildar í síðustu viku.
