Verður Oddur leikmaður mánaðarins?

Oddur Gretarsson leikmaður Balingen-Weilstetten er einn sjö leikmanna sem koma til greina sem leikmaður desembermánaðar í þýsku 2. deildinni í handknattleik en valið fer fram á síðu þýska handknattleiksins.

Oddur hefur leikið afar vel með Balingen-Weilstetten á keppnistímabilinu og var frammistaðan í desember e.t.v. spegilmynd af mánuðunum á undan. Hann skoraði m.a. 36 mörk í fimm leikjum, var með 90% skotnýtingu, skoraði úr 12 af 13 vítaköstum sem hann spreytti sig á og vann boltann þrisvar sinnum af andstæðingum sínum.

Hægt er að smella hér til þess að taka þátt og greiða Oddi atkvæði sitt. Kosningin stendur út næsta mánudag 9. janúar.