„Fyrri hálfleikurinn var góður hjá okkur þar sem okkur tókst að undirstrika að það er ekkert auðvelt fyrir lið að koma í Laugardalshöllina til þess að vinna okkur,“ sagði Janus Daði Smárason landsliðsmaður í handknattleik í samtali við handbolta.is í Laugardalshöll í gær eftir öruggan sjö marka sigur íslenska landsliðsins á Eistlendingum í sjöttu og síðustu umferð 3. riðils undankeppni Evrópumótsins, 30:23.
Alltaf sérstakt að leika í Höllinni
„Það var frábært að fá alla þessa áhorfendur hingað til þess að styðja við bakið á okkur. Það var uppselt mörgum dögum fyrir leikinn. Það alveg hreint einstakt að leika hér í Höllinni fyrir framan fullt hús af áhorfendum. Nokkuð sem maður er stoltur af,“ sagði Janus Daði sem segir að hvað sem leikmenn eru að gera með félagsliðum sínum víða um heiminn þá skipti íslenska landsliðið alla mestu máli á íþróttasviðinu.
Stoltir yfir landsliðinu
„Landsliðið skiptir okkur alla mestu máli. Við verðum alltaf að hafa það bak við eyrað hvað sem við erum að gera dags daglega með okkar félagsliðum. Við erum stoltir af því að vera með landsliðinu og ná árangri með því. Hópurinn er orðinn frábær. Saman eigum við þann draum að ná einhverjum alvöru árangri á stórmóti. Annars man enginn eftir stórmóti með okkur þegar fram líða stundir,“ sagði Janus Daði Smárason landsliðsmaður í handknattleik í samtali við handbolta.is í gær.
