„Við vitum ekki alveg hvar við verðum á næsta tímabili. Eftir að við erum orðin þriggja manna fjölskylda þarf margt að ganga upp. Við erum að skoða okkar mál,“ segir Sandra Erlingsdóttir landsliðskona í handknattleik í samtali við handbolta.is spurð úr hvorri Keflavíkinni hún ætla að róa á næstu leiktíð. Félag hennar síðustu þrjú ár, TuS Metzingen í Þýskalandi, sagði frá í gær að Sandra verði alltént ekki í herbúðum liðsins á næstu leiktíð.
Daníel Þór Ingason, sambýlismaður Söndru og barnsfaðir, er laus undan samningi hjá Balingen-Weilstetten í lok leiktíðar. Eins og handbolti.is sagði frá í gær hafa Sandra og Daníel Þór verið síðustu daga orðuð við Val og ÍBV en Sandra er úr Eyjum.
„Við lítum í kringum okkur og erum opin fyrir Skandinanvíu þar sem er aðeins þægilegra umhverfi en einnig erum við spennt fyrir að koma heim,“ segir Sandra og bætir við að ekkert sé ennþá í hendi hjá þeim.
Sandra eignaðist dreng síðla í júlí. Hún segir vel hafa gengið að koma sér til baka í form. Ekki síst hafi síðustu tveir mánuðir verið árangursríkir og framfarir orðið merkjanlegar frá einni æfingu til annarrar.
Lengra viðtal við Söndru er í myndskeiði hér fyrir ofan.
