„Við höfum verið í brasi með að klára jafna leiki. Þar af leiðandi var extra gaman að okkur tókst að vinna þennan mikilvæga leik með góðum síðari hálfleik,“ sagði handknattleikskonan Sandra Erlingsdóttir, við handbolta.is í morgun. Í gærkvöldi tókst Söndru og samherjum í EH Aalborg krækja sér í oddaleik í umspili dönsku B-deildarinnar þegar þær unnu SønderjkyskE, 30:28, á útivelli.
Sandra og samherjar sneru leiknum sér í hag í síðari hálfleik eftir að hafa verið fjórum mörkum undir, 16:12, þegar gengið var til búningsherbergja í hálfleik.
„Við breyttum í fimm einn vörn og þær fóru í sjö á sex í sókninni sem gekk ekki hjá þeim og við kláruðum þetta í seinni hálfleik,“ sagði Sandra sem skoraði fimm mörk í leiknum.
EH Aalborg tapaði fyrir SønderjyskE á heimavelli sínum, Nørresundby Idrætscenter, 26:23 um síðustu helgi.
Eins og gefur að skilja ríkir mikil eftirvænting fyrir oddaleiknum á sunnudaginn í Nørresundby Idrætscenter. Sigurliðið mætir Horsens, sem rak lestina í umspilskeppni neðstu liða úrvalsdeildarinnar, um keppnisrétt í úrvalsdeildinni á næsta keppnistímabili.
