„Ég tel okkur eiga ágæta möguleika,“ segir Ágúst Þór Jóhannsson hinn þrautreyndi þjálfari Íslandsmeistara Vals um væntanlega viðureign við slóvakíska lðið MSK IUVENTA Michalovce í síðari undanúrslitaleik Evrópubikarkeppni kvenna í handknattleik í N1-höllinni á Hlíðarenda á morgun. Viðureignin hefst klukkan 17.30 og verður mikið um dýrðir.
Valur þarf að vinna upp tveggja marka tap úr fyrri viðureigninni sem fram fór í Michalovce í Slóvakíu um síðustu helgi, 25:23.
„Til þess að vinna með meira en tveggja marka mun þurfum við topp frammistöðu á báðum endum vallarsins, það er alveg klárt,“ segir Ágúst Þór en íslenskt kvennalið hefur aldrei komist í úrslit Evrópukeppni félagsliða.
„Liðin eru svipuð að getu. MSK IUVENTA Michalovce er atvinnumannalið með mikla sögu og reynslu. Við erum líka með mjög sterkt lið og eru vel undirbúin,“ segir Ágúst Þór og bætir við.
MSK IUVENTA Michalovce lék til úrslita í Evrópubikarkeppninni síðasta vor en beið lægri hlut.
„Við ætlum að selja okkur dýrt í leiknum, brjóta blað og komast í úrslit í Evrópukeppni í fyrsta skipti. Til þess að svo verði þurfum við alvöru frammistöðu en um leið fullt hús af áhorfendum á Hlíðarenda. Það er alveg klárt mál. Fjölskyldur verða að koma saman og einnig leikmenn annarra liða. Við verðum öll að leggjast á eitt og hjálpast að við brjóta blað. Þetta er stórt fyrir íslenskan handbolta,“ segir Ágúst Þór Jóhannsson, þjálfari Vals.
Lengra viðtal við Ágúst Þór er í myndskeiði hér fyrir ofan.
Sjá einnig: ÍBV og Valur komust í undanúrslit fyrir tveimur áratugum
Síðari viðureign Vals og slóvakísku meistaranna MSK IUVENTA Michalovc fer fram í N1-höllinni á Hlíðarenda á morgun, sunnudag. Flautað verður til leiks klukkan 17.30.
Rétt er að hvetja handknattleiksáhugafólk til þess að fjölmenna á Hlíðarenda á sunnudaginn og styðja Valsliðið til sigurs. Íslenskt kvennalið hefur aldrei leikið til úrslita í Evrópukeppni félagsliða.
