- Auglýsing -
- Viggó Sigurðsson fyrrverandi landsliðsþjálfari í handknattleik karla, þjálfari og leikmaður utan lands sem innan um langt árabil, var í gær sæmdur gullmerki með lárviðarsveig sem er æðsta heiðursmerki Víkings. Viggó var m.a. í fyrsta Íslandsmeistaraliði Víkings í handknattleik 1975. Sonur Viggós, Jón Gunnlaugur var við sama tækifæri sæmdur gullmerki félagsins. Hann er m.a. þjálfari karlaliðs Víkings og yfirþjálfari handknattleiksdeildar um þessar mundir. Faðir Viggós og afi Jóns Gunnlaugs, Sigurður Jónsson, var um árabil formaður HSÍ.
- Hinir árvökulu tímaverðir og ritarar á kappleikjum handknattleiksliða Aftureldingar til margra ára, Gunnar Ólafur Kristleifsson og Ingi Már Gunnarsson, voru sæmdir gullmerki Aftureldingar á uppskeruhátíð félagsins í fyrradag. Þeir félagar hafa staðið vaktina við tímavarðaborðið á Varmá og reyndar víðar árum saman í sjálfboðavinnu og ekki slegið feilnótu.
- Sænski landsliðsmaðurinn Karl Wallinius er meiddur á hné og varð að draga sig út úr landsliðshópi Svía fyrir heimsmeistaramótið sem hefst 11.janúar. Olle Forsell Schefvert leikmaður Rhein-Neckar Löwen tekur sæti Wallinius.
- Króatíski hornamaðurinn Ivan Cupic verður ekki með landsliði sínu á heimsmeistaramótinu sem hefst 11. janúar í Svíþjóð og Póllandi. Hann er meiddur á hné. Hrvoje Horvat, landsliðsþjálfari Króatíu, hefur staðfest fjarveru Cupic sem er einn leikreyndasti handknattleiksmaður Króata um þessar mundir. Í gær bættist Tin Lucin á sjúkralistann. Tomislav Severec og Jakov Gojun hafa verið kallaðir inn í hópinn í staðinn.
- Einnig hefur verið staðfest að markakóngur HM i Egyptalandi fyrir tveimur árum, Frankis Marzo, leikur ekki með landsliði Katar á HM í næsta mánuði. Eins og nærri má geta er um talsvert áfall að ræða fyrir landslið Katar.
- Auglýsing -
