Frábær frammistaða Viktors Gísla Hallgrímssonar og framúrskarandi varnarleikur færði Nantes sigur á Nimes, 26:21, í frönsku 1. deildinni í handknattleik karla í kvöld. Viktor Gísli varði 11 skot, 36%, í leiknum er sagður hafa riðið baggamuninn fyrir liðið að þessu sinni. Nantes var fimm mörkum yfir að loknum fyrri hálfleik, 15:10.
Spánverjinn Valero Rivera var markahæstur hjá Nantes, eins og stundum áður. Hann skoraði sjö sinnum.
Nantes er í fjórða sæti deildarinnar með 17 stig að loknum 10 leikjum, tveimur stigum á eftir Montpellier sem er sem stendur í efsta sæti. Montpellier tapaði sínu fyrsta stigi í deildinni í kvöld með jafntefli á heimavelli við Saint Raphaël, 35:35.
PSG er í öðru sæti með 18 stig eftir níu leiki. PSG sækir Kristján Örn Kristjánsson, Donna, og félaga heim á morgun.
