Viktor Gísli er franskur bikarmeistari

Ívar Benediktsson

10.06.23

Viktor Gísli Hallgrímsson markvörður Nantes og íslenska landsliðsins. Mynd/Hafliði Breiðfjörð

- Auglýsing -

Viktor Gísli Hallgrímsson varð í kvöld franskur bikarmeistari í handknattleik þegar Nantes vann Montpellier, 39:33, í úrslitaleik sem fram fór í París. Þetta er í annað sinn sem Nantes vinnur frönsku bikarkeppnina.

Þetta var annar bikarinn sem Nantes vinnur á leiktiðinni því í upphafi keppnistímabilsins stóð liðið uppi sem sigurvegari í meistarakeppninni.

Viktor Gísli stóð lengst af í marki Nantes og varði níu skot, 27%. Valero Rivera var markahæstur með 11 mörk, þar af átta úr vítaköstum. Julien Bos skoraði níu mörk fyrir Montpellier.

Nantes var sterkara liðið í leiknum frá upphafi til enda. M.a. var forskot liðsins fjögur mörk í hálfleik, 21:17.