Viktor Gísli Hallgrímsson markvörður Nantes og íslenska landsliðsins meiddist á ný á olnboga í leik með Nantes í gær þegar liðið mætti Sélestat í frönsku 1. deildinni í handknattleik.
„Ég fékk mjög slæmt högg og er aumur í dag. Meira er ekki vitað sem stendur. Ég hitti lækni síðar í dag,“ sagði Viktor Gísli í skilaboðum til handbolta.is fyrir stundu.
Rúmur mánuður er þangað til heimsmeistaramótið í handknattleik hefst í Svíþjóð og Frakklandi.
Samkvæmt frásögn franska vefmiðilsins HandNews var komið fram í síðari hálfleik þegar Viktor Gísli meiddist og varð að fara af leikvelli. Hann hafði þá haldið uppteknum hætti frá síðustu leikjum, farið a kostum í markinu og varið 12 skot, 48%.
Viktor Gísli fékk yfirspennu á olnbogann á æfingu með Nantes í september og var frá keppni í nokkrar vikur. Hann missti m.a. af landsleikjunum við Ísrael og Eistland október. Leitaði hann sér m.a. lækninga hér á landi meðan íslenska landsliðið var saman við æfingar.
Eftir miðjan október mætti Viktor Gísli til leiks á ný og hefur síðan nánast lokað marki Nantes í hverju leiknum á eftir öðrum.
