Viktor Sigurðsson og Karen Ösp Guðbjartsdóttir eru handknattleiksfólk ársins hjá ÍR og voru þeim veittar viðurkenningar sínar í hófi félagsins á dögunum þar sem íþróttamenn deilda voru heiðraðir.
„Viktor var framúrskarandi í liði ÍR-inga sem átti erfitt uppdráttar á liðnu tímabili í Olís-deildinni. Þrátt fyrir ungan aldur er Viktor gríðarlega mikilvægur leikmaður í sínu liði og drífur sína félaga áfram á vellinum. Viktor er uppalinn ÍR-ingur og félaginu til sóma hvar sem hann kemur fram fyrir hönd ÍR,“ segir í tilkynningu handknattleiksdeildar ÍR.
„Karen Ösp hefur verið okkur ÍR-ingum afar mikilvæg í markinu frá því að hún gekk til liðs við ÍR. Í Grill66-deildinni á síðasta tímabili spilaði Karen stórt hlutverk í ungu og efnilegu liði ÍR. Karen er frábær félagsmaður og fyrirmynd innan sem utan vallar fyrir ungar ÍR-stelpur sem eru að stíga sín fyrstu skref í meistaraflokki,“ segir ennfremur í tilkynningu handknattleiksdeildar ÍR.
Haukur Loftsson var gerður að heiðursfélaga ÍR á dögunum. Haukur hefur verið óþreytandi í sjálfboðaliðastarfi handknatteiksdeildar ÍR um langt árabil.
„Haukur er virkur á öllum vígstöðvum. Hann heldur ásamt öðrum uppi getraunastarfi félagsins, fjáraflar fyrir meistaraflokkana og er alltaf liðtækur í aðstoð þegar halda þarf yngriflokka mót.
Haukur er hreinlega ómissandi í heimaleikjaráði karla og kvenna en þegar leikir meistaraflokka fara fram er hann alltaf mættur, boðinn og búinn til að aðstoða. Haukur er ómetanlegur félagi handknattleiksdeildarinnar. Það er alveg sama hvaða verkefni þarf að klára, fyrir Hauki er ekkert verkefni of smátt eða stórt. Hann er sannur heiðursfélagi en Haukur hlaut einmitt gullmerki ÍR árið 2002,” segir m.a. í tilkynningu handknattleiksdeildar ÍR af þessu tilefni.
