Stefan Madsen þjálfari danska meistaraliðsins Aalborg Håndbold reiknar með að Aron Pálmarsson taki eitthvað þátt í leiknum við Meshkov Brest í Meistaradeild Evrópu í handknattleik í kvöld. Leikurinn fer fram í Álaborg. Aron hefur ekki leikið með Álaborgarliðinu frá 8. september. Þá meiddist hann á mjöðm í viðureign Aalborg og Ringsted í dönsku úrvalsdeildinni.
„Ég vona svo sannarlega að hann geti eitthvað tekið þátt í leiknum,“ segir Madsen í samtali við Nordjyske. „Aron er að ná sér strik og hefur æft af krafti með liðinu upp á síðkastið,“ segir Madsen ennfremur.
Aalborg hefur unnið tvo leiki en tapað einum til þessa í Meistaradeild Evrópu auk þess að vera í öðru sæti í dönsku úrvalsdeildinni auk þess sem liðið hafnaði í þriðja sæti á heimsmeistaramóti félagsliða sem lauk á síðasta laugardag.
