Portúgal vann níu marka sigur á Ísrael, 31:22, en lið þjóðanna eru í riðli með íslenska og litháenska landsliðinu í undankeppni EM2022. Portúgal var tveimur mörkum yfir að loknum fyrri hálfleik, 14:12. Leikið var í Matosinhos í nágrenni Porto í Portúgal.
Ísraelsmenn byrjuðu leikinn af nokkrum krafti gegn værukærum leikmönnum portúgalska landsliðsins sem er að uppistöðu til skipað leikmönnum frá Porto sem leikur m.a. í Meistaradeild Evrópu. Ísrael skoraði fjögur af fyrstu fimm mörkum leiksins.
Í síðari hálfleik var blaðran sprungin hjá Ísraelsmönnum. Flestir leikmenn liðsins hafa ekki leikið handknattleik síðan í byrjun apríl að keppni var slaufað í deildarkeppninni í Ísrael. Þráðurinn hefur ekki verið tekinn upp á nýjan leik en útgöngubann hefur verið síðustu vikur í Ísrael vegna kórónuveirunnar.
Ísraelska landsliðið átti að koma hingað til landsleiks og mæta íslenska landsliðinu á laugardaginn. Leiknum var frestað á dögunum um óákveðinn tíma.
Antonio Areia Rodrigues, Pedro Portela, Alexis Borges Hernandez og Victor Manuel Iturriza Alvarez voru markahæstir hjá portúgalska landsliðinu með fjögur mörk hver.
Gil Pomeranz var yfirburðamaður í liði Ísraels. Hann skoraði níu mörk og brást aðeins bogalistin í einu skot. Adir Cohen var næstur með þrjú mörk.
Portúgalska landsliðið heldur nú til Litháen og mætir heimamönnum í Tallinn á sunnudaginn.
