Handknattleiksmaðurinn Luka Vukicevic er ekki væntanlegur á nýjan leik til Fram á næsta keppnistímabili. Hann fékk fyrir nokkru félagaskipti frá Fram til félagsliðs í Sameinuðu Arabísku Furstadæmunum og hefur þar með kvatt Úlfarsárdalinn og herbúðir Fram. Einar Jónsson þjálfari Fram staðfesti þetta við handbolta.is.
Vukicevic, sem er örvhent skytta, kom til Fram á síðasta sumri frá Bregenz í Austurríki. Hann skoraði 80 mörk í 21 leik í Olísdeildinni og bætti nokkrum við í úrslitakeppninni og í Poweradebikarnum þar sem Fram féll úr leik í undanúrslitum.
Víkur fyrir Rúnari
„Vukicevic fór frá okkur í góðu. Við fáum Rúnar [Kárason] í sumar og Vukicevic hafði fullan skilning á því og ákvað að leita annað,“ sagði Einar við handbolta.is. Vukicevic fékk félagaskipti 12. maí. Nafn félagsins er ekki gefið upp á vef HSÍ. Eins er óvíst með hvort Vukicevic staldri við til lengri í tíma eystra.
