Stjarnan er komin í vænlega stöðu í rimmu sinni við KA/Þór eftir öruggan sigur í fyrstu viðureign liðanna í TM-höllinni í Garðabæ í kvöld, 24:19. Annar leikur liðanna fer fram í KA-heimilinu á fimmtudaginn og hefst klukkan 17. Staðan var jöfn í hálfleik, 10:10.
KA/Þór var með undirtökin í fyrri hálfleik og var alltaf á undan að skora. Snemma í síðari hálfleik tók Stjarnan frumkvæðið í leiknum og náði tveggja til þriggja marka forskoti. Ekki síst munaði um stórleik Dariju Zecevic markvarðar. Hún var meginmunurinn á liðunum lengst af. KA/Þór tókst að minnka muninn í eitt mark, 18:17. Nær komst liðið ekki.
Leiðir skildu á ný og vonin datt niður meðal leikmanna KA/Þórs sem verða að herða upp hugann fyrir næstu viðureign ef sumardagurinn fyrsti á ekki að marka upphafs sumarleyfis þeirra.
Mörk Stjörnunnar: Elísabet Gunnarsdóttir 5, Britney Cots 4, Eva Björk Davíðsdóttir 3/2, Lena Margrét Valdimarsdóttir 3, Anna Karen Hansdóttir 3, Hanna Guðrún Stefánsdóttir 2, Aníta Theodórsdóttir 2, Vigdís Arna Hjartardóttir 1/1, Helena Rut Örvarsdóttir 1.
Varin skot: Darija Zecevic 16/1, 47,1%.
Mörk KA/Þórs: Kristín A. Jóhannsdóttir 5, Ida Margrethe Hoberg 3, Rut Arnfjörð Jónsdóttir 3/1, Nathalia Soares Baliana 2, Júlía Björnsdóttir 2, Hildur Lilja Jónsdóttir 1, Anna Þyrí Halldórsdóttir 1, Lydía Gunnþórsdóttir 1.
Varin skot: Matea Lonac 19, 29,4%.
