- Auglýsing -
- Bjarki Már Elísson skoraði 10 mörk og var markahæstur hjá One Veszprém í 20 marka sigri á Gyöngyös, 45:25, á útivelli í 22. umferð ungversku 1. deildarinnar í kvöld. Aron Pálmarsson er ennþá frá keppni vegna meiðsla. One Veszprem er sem fyrr efst í deildinni með 42 stig eftir 22 leiki. Pick Szeged er átta stigum á eftir og á tvo leiki inni á Veszprém.
- Arnór Atlason stýrði TTH Holstebro til sigurs á Nordsjælland í dönsku úrvalsdeildinni á heimavelli í kvöld, 31:27. Með sigrinum treysti TTH Holstebro stöðu sína í sjöunda sæti deildarinnar þegar tvær umferðir eru eftir. Átta efstu liðin fara í úrslitakeppni í vor.
- Dagur Gautason lék ekkert með Montpellier þegar liðið vann Saint-Raphaël, 30:28, á útivelli í frönsku 1. deildinni í handknattleik í kvöld. Montpellier fór upp í annað sæti með sigrinum. Liðið hefur 37 stig eftir 22 leiki. PSG og Nantes eru í fyrsta og þriðja sæti og eiga leik inni gegn Montpellier.
- Grétar Ari Guðjónsson, markvörður, kom heldur ekkert við sögu hjá Ivry í eins marks tapi liðsins á heimavelli gegn Istres, 31:30, í frönsku 1. deildinni í kvöld. Ivry rekur lestina í deildinni með sjö stig eftir 22 leiki.
- Haukur Þrastarson og félagar í Dinamo Búkarest halda áfram sigurgöngu sinni í rúmensku úrvalsdeildinni. Þeir unnu CSM Fágáras, 34:25, á útivelli í kvöld. Haukur skoraði eitt mark og gaf tvær stoðsendingar. Dinamo hefur unnið 20 leiki og gert eitt jafntefli í deildinni til þessa.
- Næsti leikur Dinamo verður eftir viku gegn Minaur Baia Mare í undanúrslitum bikarkeppninnar.
- Viktor Petersen Norberg skoraði þrjú mörk og gaf þrjár stoðsendingar þegar lið hans, Wetzlar, tapaði fyrir Stuttgart, 28:26, á heimavelli í þýsku 1. deildinni í handknattleik í kvöld. Wetzlar er í 12. sæti af 18 liðum eftir 25 leiki af 34.
- Auglýsing -
