- Auglýsing -
- Danski dómarinn, Jesper Madsen, sem féll í yfirlið í kappleikjum í lok febrúar og aftur í byrjun mars, hefur fengið greiningu á því hvað hrjáir hann. Um er að ræða svokallað steinaflakk í eyrum sem m.a. veldur svima. Hann hefur tekið upp þráðinn aftur eftir greiningu og ætlar að dæma áfram, a.m.k. út leiktíðina.
- Danski landsliðsmaðurinn Thomas Arnoldsen leikur ekki með Aalborg Håndbold næstu vikurnar. Þessu ungi handknattleiksmaður sem slegið hefur í gegn undanfarið ár er andlega og líkamlega þreyttur og hefur ákveðið að draga sig út úr sviðsljósinu um óákveðinn tíma, að læknisráði.
- Þýska handknattleiksliðið MT Melsungen varð fyrir enn einu áfallinu um helgina þegar markvörðurinn sterki, Nebojsa Simic, meiddist á hné í viðureign við Gummersbach í þýsku 1. deildinni. Óttast er að Simic hafi slitið krossband. Sé svo verður Svartfellingurinn lengi frá keppni. Til að bæta gráu ofan á svart er markvörðurinn Adam Morawski einnig meiddur.
- Vegna þessa þá verður markvarðaþjálfarinn Carsten Lichtlein sennilega að standa í marki MT Melsungen á endasprettinum. Lichtlein er 44 ára gamall og hætti keppni fyrir nokkrum árum en ennþá í ágætu líkamlegu formi. Auk Lichtlein hefur Melsungen innan sinna raða 19 ára gamlan markvörð sem skiljanlega er reynslulítill, Pawel Krawczyk.
- Melsungen mætir Bidasoa Irún í átta liða úrslitum Evrópudeildarinnar á heimavelli í kvöld þegar fyrri umferðin fer fram.
- Einnig mætast GOG og Flensburg, Limoges og Kiel og Porto fær Montpellier í heimsókn. Síðari leikir átta liða úrslita fara fram eftir viku.
- Auglýsing -
