- Auglýsing -
- Anders Eggert hefur tekið við þjálfun danska handknattleiksliðsins KIF Kolding. Hann á að leiða endurreisn þessa fornfræga liðs sem féll úr úrvalsdeildinni í vor. Eggert hefur undanfarin tvö ár verið aðstoðarþjálfari Flensburg–Handewitt. Eggert er 42 ára gamall og var lengi einn af lykilmönnum danska landsliðsins. Hann lagði skóna á hilluna fyrir þremur árum. Eggert var leikmaður Flensburg frá 2006 til 2017 og þar með að kveðja félagið í annað sinn.
- Eggert býr í Kolding á Jótlandi og var aðstoðarþjálfari liðsins frá 2022 til 2024 þangað til hann var ráðinn aðstoðarþjálfari Flensburg.
- Franski landsliðsmarkvörðurinn, Cléopâtre Darleux, hefur ákveðið að láta gott heita í lok keppnistímabilsins eftir 18 ára feril sem atvinnukona í handknattleik. Hennar síðustu leikir verða Metz í úrslitahelgi Meistaradeildar Evrópu um næstu mánaðamót.
- Darleux verður 36 ára 1. júlí í sumar. Hún hefur lengst af leikið með félagsliðum í Frakklandi og tekið þátt í yfir 200 landsleikjum og unnið heims- og Evrópumeistaratitla með franska landsliðinu. Darleux hefur sig mikið látið varða réttindi handknattleikskvenna á ferli sínum.
- Martin Tomovski markvörður landsliðs Norður Makedóníu varði 13 skot í sigurleik Norður Makedóníu á Eistlandi í 1. riðli undankeppni EM í handknattleik karla í Tallin. Það væri e.t.v. ekki í frásögur færandi ef hlutfallsmarkvarsla Tomovski hafi ekki náð 68% sem er fáheyrt hlutfall. Eistlendingar áttu erfitt uppdráttar í leiknum gegn Tomovski og sterkri vörn Norður Makedóníu og töpuðu með 19 marka mun, 36:17.
- Svíinn Ola Lindgren hefur framlengt samning sinn við finnska handknattleikssambandið um þjálfun landsliðsins fram til 2028. Lindgren tók við þjálfun finnska karlalandsliðsins fyrir sex árum og hefur gert það gott. Finnska landsliðið á von um sæti í lokakeppni EM 2026.
Vinsælt lesefni:
- Auglýsing -
