Handknattleikssamband Ísland hefur hresst upp á heimasíðu sína og var breytt síða opinberuð í gær. Breytingarnar eru hluti af nýrri ásýnd HSÍ sem formaður HSÍ, Jón Halldórsson, kynnti á laugardaginn á fundi í Valsheimilinu.
Ný heimasíða hefur verið í vinnslu um nokkurra mánaða skeið í samvinnu við 1xINTERNET sem er eitt samstarfsfyrirtækja HSÍ.
„Í nýrri ásýnd nýtum við sama form fyrir Olísdeildina, Grilldeildina, Handboltapassann, Handboltahöllina og HSÍ. Þannig náum við að skapa heildarásýnd yfir það efni sem HSÍ stendur að.
Þessi ásýnd verður svo nýtt áfram með upphaflegu merki HSÍ.
Þetta er ekki gert á einni nóttu heldur mun ásýndarvinnan birtast jafnt og þétt á næstu mánuðum,“ segir í tilkynningu á nýrri heimasíðu HSÍ undir slagorðunum – Við erum hjartað í boltanum og við erum hjartað í stúkunni.
