Bjarki Már Elísson leikmaður One Veszprém. Ljósmynd/EPA
- Auglýsing -
Bjarki Már Elísson var markahæstur hjá One Veszprém við þriðja mann þegar liðið vann PLER-Búdapest, 42:21, í þriðja leik liðanna í ungversku úrvalsdeildinni í gær. Bjarki Már skoraði sex mörk. Staðan var 21:12 að loknum fyrri hálfleik. One Veszprém hefur unnið þrjár fyrstu viðureignir sínar í deildinni.
Áfram heldur sigurganga Óðins Þórs Ríkharðssonar og félaga í Kadetten Schaffhausen í svissnesku A-deildinni í handknattleik. Óðinn Þór skoraði sex mörk, þar af þrjú úr vítaköstum í 12 marka sigri Kadetten á TSV St. Otmar St. Gallen, 44:32, í gær. Leikið var á heimavelli Kadetten, Schaffhausen, BBC Arena, að viðstöddum 592 áhorfendum. Kadetten hefur fimm vinninga í deildinni eftir fimm viðureignir.
Tjörvi Týr Gíslason skoraði tvö mörk í gær þegar lið hans, HC Oppenweiler/Backnang, tapaði naumlega og með eins marks mun fyrir TuS Ferndorf í, 31:30, í fjórðu umferð 2. deildar þýska handknattleiksins.
Leikið var í Murrtal-Arena, heimavelli Oppenweiler/Backnang í suður Þýskalandi. Nýliðar Oppenweiler/Backnang hafa eitt stig að loknum fjórum fyrstu leikjunum í 17. og næst neðsta sæti deildarinnar.
Sveinn Jóhannsson lék með Chambéry í rúmar 18 mínútur í gær gegn Montpellier í þriðju umferð efstu deildar franska handknattleiksins. Hann skoraði eitt mark. Montpellier vann leikinn örugglega, 28:21. Chambéry situr í 9. sæti með þrjú stig að loknum þremur viðureignum. Sveinn kom til félagsins í sumar.
Stöðuna í mörgum deildum evrópsks handknattleiks þar sem Íslendingar koma við sögu er að finna hér.
