- Auglýsing -
- Mie Blegen Stensrud samherji Dönu Bjargar Guðmundsdóttur landsliðskonu hjá norska 1. deildarliðinu Volda skoraði 24 mörk þegar Volda vann Flint Tønsberg, 41:31, í fyrrakvöld. Þetta er jöfnun á meti Heidi Løke sem skoraði 24 mörk fyrir Larvik í leik við Selbu í leik í norsku úrvalsdeildinni fyrir 15 árum síðan.
- Michael Allendorf íþróttastjóri MT Melsungen hætti óvænt störfum hjá félaginu í gær. Allendorf hefur verið hjá Melsungen í 15 ár, þar af í 12 ár sem leikmaður. Eftir að Allendorf lagði skóna á hilluna var hann ráðinn íþróttastjóri liðsins. Ekki kemur fram hver er ástæðan fyrir skyndilegri uppsögn Allendorfs.
- HC Erlangen, sem Andri Már Rúnarsson og Viggó Kristjánsson leika með í Þýskalandi, hafa samið við 19 ára gamlan króatískan markvörð, Tin Herceg. Hann kemur til félagsins nú þegar og á að vera þriðji markvörður liðsins auk þess að leika með yngra liði Erlangen. Herceg var í herbúðum Trimo Trebnje í heimalandinu. Hann á að fylla skarð Dorian Knezevic sem verður frá keppni út leiktíðina.
- Þýsku tónlistarkonurnar Lucille & Bria X hafa samið opinbert lag heimsmeistaramóts kvenna sem fram fer í Hollandi og Þýskalandi í janúar. Lagið heitir „Hands up for more“ og má heyra það hér fyrir neðan.
- Auglýsing -
