- Auglýsing -
- Viktor Lekve þjálfari KÍF frá Kollafirði stýrði sínum mönnum til sigurs gegn StÍF, 29:28, í fyrsta heimaleiknum á tímabilinu í færeysku úrvalsdeildinni í handknattleik í gær. KÍF hefur fjögur stig eftir fjóra leiki í 5. sæti deildarinnar.
- Benedikt Emil Aðalsteinsson lék ekki með KÍF enda ekki kominn með leikheimild ef marka má félagaskiptavef HSÍ. Benedikt Emil lék síðast með Víkingi en mun hafa í hyggju að leika með KÍF.
- Viktor Gísli Hallgrímsson kom ekkert við sögu í gær þegar Barcelona vann Granollers, 35:28, á útivelli í spænsku 1. deildinni í handknattleik karla. Emil Nielsen stóð á milli stanganna í marki Barcelona frá byrjun til enda leiksins og varði 12 skot, 30%. Dika Mem var markahæstur leikmanna Barcelona með sjö mörk og Ian Barrufet kom næstur á eftir með sex mörk. Barcelona hefur fjóra vinninga eftir fjóra leiki í deildinni.
- Elvar Ásgeirsson skoraði tvö mörk, gaf þrjár stoðsendingar og var einu sinni vikið af leikvelli þegar Ribe-Esbjerg gerði jafntefli við GOG í dönsku úrvalsdeildinni í handknattleik í gær, 24:24, á heimavelli. Úrslitin komu á óvart vegna þess að Ribe-Esbjerg hefur ekki vegnað vel á leiktíðinni til þessa.
- Ágúst Elí Björgvinsson sem er nýlega kominn til Ribe-Esbjerg eftir leigudvöl hjá Aalborg Håndbold var ekki í leikmannahópi Ribe-Esbjerg í gær.
- Ribe-Esbjerg er í áttunda sæti með sex stig eftir sjö viðureignir.
- Elmar Erlingsson skoraði þrjú mörk og átti fjórar stoðsendingar er Nordhorn-Lingen tapaði naumlega fyrir VfL Potsdam, 34:33, á heimavelli í 2. deild þýska handknattleiksins í gær. Nordhorn-Lingen er í níunda sæti deildarinnar með sjö stig eftir sjö leiki.
- Viktor Petersen Norberg skoraði tvisvar og gaf fjórar stoðsendingar í góðum útisigri Dresden-liðsins Elbflorenz í heimsókn til Coburg, 35:30, á útivelli í þýsku 2. deildinni í handknattleik í gær. Elbflorenz er í fjórða sæti deildarinnar með 10 stig eftir sjö leiki.
- Auglýsing -
