- Auglýsing -
- Þorsteinn Leó Gunnarsson skoraði þrjú mörk í stórsigri FC Porto á Arsenal D.Devesa, 43:17, í efstu deild í portúgalska handknattleiknum í gær. Með sigrinum laumaðist Porto upp í efsta sæti deildarinnar. Sporting á hinsvegar leik inni og endurheimtir efsta sætið takist liðinu að vinna Povoa í dag.
- Sveinn Jóhannsson var í sigurliði Chambéry á Saint-Raphaël, 35:33, á heimavelli í frönsku 1. deildinni í handknattleik í gær. Sveinn skoraði þrjú mörk úr þremur skotum og lék með í um 20 mínútur. Chambéry er komið upp í 8. sæti af 16 í deildinni með sex stig að loknum sjö umferðum.
- Tumi Steinn Rúnarsson skoraði þrjú mörk og gaf átta stoðsendingar þegar Alpla Hard vann grannaslaginn við Bregenz í austurrísku 1. deildinni í handknattleik í gær, 33:28. Tryggvi Garðar Jónsson stóð vaktina í vörn Alpla Hard og átti eina stoðsendingu.
- Hannes Jón Jónsson er þjálfari Alpla Hard sem er í þriðja sæti deildarinnar með sjö stig að loknum sex leikjum. Ferlach er efst með níu stig en Aon Fivers situr í öðru sæti með átta stig og leik til góða í dag.
- Fyrrverandi leikmaður Akureyri handboltafélags, Litáinn Mindaugas Dumcius, var atkvæðamestur leikmanna Bregenz með 10 mörk og tvær stoðsendingar. Dumcius kom til Bregenz í sumar frá Elbflorenz í Dresden.
- Elmar Erlingsson skoraði þrjú mörk og átti þrjár stoðsendingar þegar lið hans, Nordhorn-Lingen, steinlá í heimsókn til Elbflroenz í Dresden í gær, 34:22. Liðin eiga sæti í 2. deild þýska handknattleiksins. Nordhorn er í 9. sæti.
- Hinn hálf íslenski Viktor Petersen Norberg skoraði tvisvar fyrir Elbflorenz og gaf tvær stoðsendingar. Elbflorenz er í öðru sæti með 12 stig, tveimur á eftir Bietigheim.
- Þrátt fyrir þjálfaraskipti í vikunni tapaði HC Oppenweiler/Backnang illa fyrir TV Großwallstadt, 41:28, á útivelli í 2. deild þýska handknattleiksins í gær. Tjörvi Týr Gíslason skoraði eitt mark fyrir HC Oppenweiler/Backnang sem rekur lestina í deildinni með tvö stig eftir átta viðureignir.
- Grétar Ari Guðjónsson, markvörður, og liðsfélagar í AEK unnu Feronas Verias, 44:28, á heimavelli í 6. umferð grísku 1. deildarinnar í handknattleik í gær. AEK hefur unnið allar viðureignir sínar til þessa í deildinni og er efst ásamt Olympiakos.
- Auglýsing -
