- Auglýsing -
- Tékkinn Filip Jicha hefur skrifað undir nýjan samning við þýska liðið THW Kiel. Samningurinn gildir til ársins 2028. Jicha tók við þjálfun THW Kiel af Alfreð Gíslasyni 2019. Árangur Jicha hefur verið misjafn síðustu ár og liðið tapað stöðu sinni sem sterkasta lið þýska handknattleiksins sem það var í meðan Alfreð var við stjórnvölin. Orðrómur hefur verið uppi um að hugsanlega yrði skipt um þjálfara hjá Kiel og Jicha látinn fara. Hefur orðrómurinn m.a. valdið titringi hér á landi.
- Markvörðurinn Kristian Pilipovic, sem er samherji Óðins Þórs Ríkharðssonar hjá svissneska meistaraliðinu Kadetten Schaffhausen, kveður félagið um mánaðamótin að eigin ósk. Hann hefur ákveðið að ganga til liðs við lið í heimalandi sínu, GRK Ohrid í Norður Makedóníu.
- Í stað Pilipovic hafa forráðamenn Kadetten samið við Moreno Car hjá króatíska liðinu RK Porec. Car hefur vakið mikla athygli á leiktíðinni í Króatíu, og er í efsta sæti markvarða úrvalsdeildarinnar með hlutfallslega flest varin skot, 36%.
- Helle Thomsen landsliðsþjálfari Dana fékk slæm tíðindi í gær þegar Mie Højlund, ein mikilvægasti leikmaður landsliðsins meiddist í kappleik. Óttast er að meiðslin séu alvarleg en grunur er um hásinarmeiðsli. Thomsen ætlar að tilkynna keppnishóp sinn, 18 leikmenn, fyrir heimsmeistaramótið mánudaginn 3. nóvember.
Vinsælt lesefni:
- Auglýsing -
