- Auglýsing -
- Dagur Sigurðsson landsliðsþjálfari Króata í handknattleik karla verður án fjögurra sterkra leikmanna í vináttuleikjum við landslið Sviss í kvöld og á laugardaginn. Zvonimir Srna, Luka Cindric, Tin Lucin og David Mandic eru meiddir. Einn nýliði er í króatíska hópnum, Leon Ljevar, 24 ára gamall sem leikur með Slóveníumeisturum Slovan Ljubljana.
- Heiner Brand fyrrverandi landsliðsþjálfari Þýskalands er einn tíu þýskra þjálfara sem tekinn verður inn í Heiðurshöll þjálfara sem þýska íþrótta- og ólympíusambandið hefur sett á laggirnar í samvinnu við samtök íþróttaþjálfara í Þýskalandi. Brand og níu til viðbótar eru þeir fyrstu sem teknir eru inn í heiðurshöllina og Brand er um leið eini handboltaþjálfarinn sem hlotnast þessi heiður í þetta skipti.
- Norska landsliðskonan Sanna Solberg-Isaksen leikur ekki fleiri leiki með Esbjerg í Danmörku né norska landsliðinu á keppnistímabilinu. Solberg-Isaksen er ólétt af öðru barni sínu. Hún skrifaði á dögunum undir nýjan samning vð Esbjerg til næstu þriggja ára. Sanna Solberg-Isaksen gekk til liðs við Esbjerg fyrir níu árum.
Vinsælt lesefni:
- Auglýsing -
