- Auglýsing -
- Haukur Þrastarson var valinn leikmaður októbermánaðar hjá þýska handknattleiksliðinu Rhein-Neckar Löwen. Haukur, sem kom til félagsins í sumar, hefur fallið vel inn í leik þess. Hann skoraði m.a. 23 mörk og átti jafnmargar stoðsendingar í nýliðnum mánuði.
- Benedikt Emil Aðalsteinsson skoraði sex mörk þegar KÍF frá Kollafirði vann VÍF í Vestmanna, 30:27, í sjöttu umferð færeysku úrvalsdeildarinnar á síðasta sunnudag. Leikurinn fór fram í Vestmanna.
- KÍF, sem Viktor Lekve þjálfar, er í fjórða sæti deildarinnar með sex stig að loknum sex leikjum. VÍF er í efsta sæti.
- Áki Egilsnes, sem lék með KA um árabil, var næst markahæstur hjá VÍF með sjö mörk, en hann hefur snúið í heimahagana.
- Forsvarsmenn danska úrvalsdeildarliðsins Ikast sögðu Søren Hansen þjálfara liðsins upp í gærkvöld, nokkrum mínútum eftir að liðið tapaði með 13 marka mun fyrir Esbjerg á heimavelli í úrvalsdeild kvenna, 36:23. Döpur frammistaða liðsins í síðustu leikjum er ástæða uppsagnarinnar. Dropinn sem fyllti mælinn var skellurinn á heimavelli í gærkvöld.
- Ikast er eitt þriggja danskra liða sem á sæti í Meistaradeild Evrópu í kvennaflokki hvar árangurinn hefur verið viðunandi; þrír sigrar í sex viðureignum. Sem stendur er Ikast í fjórða sæti dönsku úrvalsdeildarinnar með 10 stig eftir átta leiki.
- Staðfest var í gær að spænski markvörðurinn Sergey Hernandez gengur til liðs við Barcelona næsta sumar og verður samherji Viktors Gísla Hallgrímssonar þegar Daninn Emil Nielsen flytur til One Veszprém í Ungverjalandi.
- Hernandez sem er nú liðsmaður Evrópumeistara SC Magdeburg hefur skrifað undir þriggja ára samning við Barcelona, frá 2026 fram á mitt ár 2029.
- Auglýsing -
