- Auglýsing -
- Austurríski landsliðsmaðurinn Nikola Bilyk hefur samið við HC Kriens-Luzern í Sviss. Samningurinn tekur gildi næsta sumar þegar samningur Bilyk við THW Kiel rennur út. HC Kriens-Luzern lék í tvígang við Fram á síðustu vikum í riðlakeppni Evrópudeildarinnar og vann báða leiki örugglega.
- Þýska kvennaliðið Buxtehuder SV hefur sagt upp þjálfaranum Dirk Leun. Uppsögnin væri e.t.v. ekki í frásögur færandi nema fyrir þá staðreynd að Leun hafði þjálfað kvennalið Buxtehuder SV í 18 ár samfleytt. Buxtehuder SV hafnaði í 10. sæti þýsku 1. deildarinnar á síðustu leiktíð af 12 liðum og hefur ekki unnið leik til þessa á leiktíðinni.
- Norski handknattleiksmaðurinn Nicolai Daling hefur samið við HSV Hamburg frá og með næsta sumri og til ársins 2029. Daling, sem er leikmaður Bergen, vann sér það til frægðar á síðustu leiktíð að missa stjórn á skapi sínu í kappleik, stökkva yfir auglýsingaskilti og hrifsa gjallarhorn af stuðningsmanni andstæðinganna og kasta því í gólfið. Honum rann í skap eftir að pilturinn með gjallarhornið hafði argast í Daling um stund.
- Bojana Popovic, fyrrverandi landsliðsþjálfari Svartfjallalands og núverandi aðstoðarþjálfari danska kvennalandsliðsins, hefur skrifað undir samning við rúmenska meistaraliðið CSM Búkarest. Hún tekur við starfinu 1. desember. Popovic, sem er ein þekktasta handknattleikskona síðari ára, var um árabil þjálfari ZRK Buducnost í heimalandinu en var sagt upp störfum fyrr á þessu ári.
- Adrian Vasile sem tók við þjálfun CSM Búkarest í sumar var gert að taka pokann sinn í upphafi þessa mánaðar.
- Christian Prokop hættir þjálfun þýska 1. deildarliðsins Hannover-Burgdorf næsta sumar. Félagið tilkynnti þetta í gær. Prokop tók við liðinu árið 2021 og um hitteðfyrra og í fyrra var liðið á meðal þeirra fremstu í þýsku 1. deildinni. Gengi Hannover-Burgdorf hefur verið upp og ofan í vetur. Heiðmar Felixson er aðstoðarmaður Prokop og hefur verið frá upphafi. Óvíst hvort Heiðmar hætti eða haldi áfram.
- Prokop var þjálfari þýska karlalandsliðsins frá 2017 til 2020. Hann tók við af Degi Sigurðssyni sem leiddi liðið til sigurs á EM 2016 og vann þriðja sætið á ÓL 2016. Prokop tókst ekki að fylgja eftir árangri Dags með liðið og var alltaf undir talsverðri gagnrýni sem landsliðsþjálfari. Alfreð Gíslason tók við af Prokop.
- Auglýsing -
