- Auglýsing -
- Ísak Steinsson markvörður kom lítið við sögu þegar Drammen HK vann Follo, 34:27, í norsku úrvalsdeildinni í handknattleik í gær. Ísak spreytti sig á einu vítakasti en hafði ekki erindi sem erfiði. Oscar Larsen Syvertsen, hinn markvörður Drammen, varði afar vel og því þurfti lítt að reyna á Ísak að þessu sinni.
- Drammen er í 5. sæti með 15 stig eftir 12 leiki, sex stigum á eftir Elverum sem er efst.
- Tryggvi Þórisson skoraði tvö mörk fyrir Elverum í öruggum sigri á Fjellhammer, 31:23, á útivelli í norsku úrvalsdeildinni í gær. Elverum er efst í deildinni með 21 stig eftir 12 leiki. Kolstad, sem á leik í dag, er þremur stigum á eftir en á tvo leiki til góða á Elverum.
- Janus Daði Smárason lék með Pick Szeged í rúmar 20 mínútur og skoraði tvö mörk þegar Pick Szeged lagði Neka á útivelli, 36:31, í ungversku úrvalsdeildinni í handknattleik í gær. Pick Szeged er efst í deildinni með 21 stig eftir 13 leiki. One Veszprém er fjórum leikjum á eftir en með 18 stig.
- Arnar Birkir Hálfdánsson skoraði eitt mark og gaf þrjár stoðsendingar þegar Amo HK vann óvænt IFK Kristianstad, 32:30, á heimavelli í sænsku úrvalsdeildinni í handknattleik í gær. Amo HK situr í 11. sæti með 9 stig eftir 12 leiki.
- Einar Bragi Aðalsteinsson var ekki í leikmannahópi IFK Kristianstad í leiknum á móti Amo HK. Kristianstad er í þriðja sæti deildarinnar með 17 stig eftir 10 leiki.
- Hákon Daði Styrmisson skoraði sex mörk, þar af þrjú úr vítaköstum, þegar lið hans Eintracht Hagen tapaði á heimavelli í gær fyrir Bietigheim í viðureign liðanna í 2. deild þýska handknattleiksins. Hagen er í fjórða sæti deildarinnar með 19 stig eftir 13 leiki. Bietigheim er efst með 22 stig.
- Tumi Steinn Rúnarsson skoraði eitt mark og gaf fjórar sendingar þegar lið hans, Alpla Hard, tapaði fyrir BT Füchse með eins marks mun, 30:29, á útivelli í austurrísku 1. deildinni í handknattleik í gær. Tryggvi Garðar Jónsson skoraði ekki mark Alpla Hard.
- Hannes Jón Jónsson er þjálfari Alpla Hard sem er í 5. sæti deildarinnar með 12 stig eftir 11 leiki. Ferlach er efst með 15 stig.
- Grétar Ari Guðjónsson og liðsfélagar í AEK Aþenu unnu í gær lið A.S.E. Douka, 37:26, í efstu deild gríska handknattleiksins. Engum sögum fer af frammistöðu Grétars Ara í marki AEK í leiknum. AEK er efst í deildinni með 20 stig að loknum 11 leikjum. Olympiakos er næst efst með 18 stig en á leiki inni á AEK.
- Dagur Sverrir Kristjánsson og liðsfélagar í Vinslövs HK töpuðu í gær tíunda leiknum í næstefstu deild sænska handknattleiksins. Að þessu sinni tapaði Vinslövs fyrir Tyresö Handball, 36:34, á útivelli. Dagur Sverrir skoraði ekki mark í leiknum. Vinslövs HK rekur lestina í Allsvenskan án stiga.
- Óðinn Þór Ríkharðsson skoraði tvö mörk þegar Kadetten Schaffhausen vann RG Nyon, 44:26, í átta liða úrslitum bikarkeppninnar í Sviss í gærkvöld.
- Auglýsing -
