Kristianstad vann góðan útisigur á Skuru, 30:29, í 12. umferð sænsku úrvalsdeildarinnar í handknattleik kvenna í dag. Með sigrinum fór liðið upp um þrjú sæti og er nú í sjötta sæti deildarinnar með 11 stig. Skuru er í níunda sæti með 10 stig.
Haukakonan Berta Rut Harðardóttir leikur með Kristianstad og skoraði tvö mörk fyrir liðið.
Staðan í hálfleik var 18:16, Skuru í vil, en leikurinn einkenndist af mikilli spennu allan tímann.
Undir lokin voru töluverðar sveiflur þar sem liðin skiptust á að skora fjögur mörk í röð. Eftir að Berta Rut kom Kristianstad í 26:24 svaraði Skuru með því að komast í 28:26.
Kristianstad skoraði í kjölfarið fjögur mörk í röð, komst þannig í 30:28 áður en Skuru skoraði síðasta mark leiksins.
Úrslit:
Skuru IK – Kristianstad HK 29:30 (18:16)
Höörs HK H 65 – Kungälvs HK 46:16 (20:8)
