Marin Sipic, línumaðurinn sterki í liði Króatíu, hefur neyðst til að draga sig úr hópi landsliðsþjálfarans Dags Sigurðssonar fyrir Evrópumótið í handknattleik karla vegna hnémeiðsla.
Króatíska dagblaðið Večernji list greinir frá því að hann geti ekki tekið þátt á mótinu vegna meiðslanna. Evrópumótið hefst um miðjan mánuðinn og fer fram í Danmörku, Noregi og Svíþjóð.
Sipic, sem leikur með Kriens-Luzern í Sviss, var í stóru hlutverki þegar Króatía hafnaði í öðru sæti á HM 2025 fyrir tæpu ári síðan.
Ljóst er að um töluvert áfall er að ræða fyrir Dag og lærisveina hans en Vecernij lýsir brottfalli Sipic sem „katastrófu“ fyrir króatíska liðið, enda algjör lykilmaður hjá því.
Dagur hefur valið Zlatko Rauzan, línumann RK Sesvete í heimalandinu, í leikmannahóp sinn í stað Sipic.
Króatía er í E-riðli með Svíþjóð, Hollandi og Georgíu á EM 2026. Sá riðill verður leikinn í Malmö í Svíþjóð. Fyrsti leikur Króatíu verður gegn Georgíu 17. janúar.
EM karla 2026 – leikdagar, leikstaðir, leiktímar
