Elias Ellefsen á Skipagøtu fer ekki ofan af því að stuðningsmenn færeyska landsliðsins í handknattleik séu þeir bestu í heimi.
Færeyjar knúðu fram dramatískt 28:28 jafntefli gegn Sviss í fyrstu umferð D-riðils Evrópumótsins í Unity Arena í Bærum í Noregi í gærkvöldi.
Stjörnurnar sneru aftur í æsispennandi jafntefli Færeyja
„Þetta er magnað. Mér finnst við vera með bestu stuðningsmenn í heimi. Þeir eru ótrúlegir þegar kemur að stuðningi við okkur. Við erum mjög hamingjusamir að þeir séu komnir hingað.
Við færum þeim kærar þakkir fyrir þetta stig. Það er aðeins auðveldara að berjast allan leikinn þegar við erum með svona marga stuðningsmenn í áhorfendastúkunni,“ sagði Elias í samtali við fjölmiðladeild Handknattleikssamband Evrópu, EHF, eftir leikinn.
Samkvæmt EHF er rúmlega 10% færeysku þjóðarinnar mætt til Bærum til að styðja við bakið á liðinu, sem gerir um 5.500 Færeyinga.
