Færeyjar eru áfram taplausar í D-riðli á Evrópumóti karla eftir stórsigur á Svartfjallalandi, 37:24, í annarri umferð riðilsins í Unity Arena í Bærum í Noregi í kvöld. Segja má að með sigrinum séu Færeyingar farnir að renna hýru auga til milliriðlakeppninnar í Malmö.
Þetta er fyrsti sigurinn á stórmóti hjá karlaliðinu og eru Færeyjar fámennasta þjóðin sem vinnur leik á stórmóti karla. Færeyjar fóru með sigrinum á toppinn í riðlinum þar sem liðið er með þrjú stig. Svartfjallaland er á botninum án stiga.
Slóvenar sem mæta Sviss síðar í kvöld verða andstæðingur færeyska liðsins í síðustu umferð á þriðjudaginn.
Stærstu stjörnurnar hjá Færeyjum stóðu fyrir sínu eins og þeirra var von og vísa og röðuðu inn mörkum.
Óli Mittún var markahæstur með tíu mörk, Hákun West av Teigum bætti við níu mörkum og Elias Ellefsen á Skipagøtu skoraði átta.
Pauli Jacobsen í marki Færeyja fór sömuleiðis á kostum er hann varði 15 skot og var með 44,1% hlutfallsmarkvörslu.
Fjórir leikmenn voru jafn markahæstir hjá Svartfjallalandi með þrjú mörk hver.
