Alþjóðahandknattleikssambandið, IHF, hefur tilkynnt hvaða þrír leikmenn koma til greina sem besti karlkyns leikmaður heims fyrir árið 2025. Á listanum eru tveir Danir og einn Króati.
Mathias Gidsel, hægri skytta heimsmeistara Danmerkur og Þýskalandsmeistara Füchse Berlín, er einn þeirra og hefur unnið til verðlaunanna undanfarin tvö ár.
Gidsel gæti orðið fyrsti leikmaðurinn í sögunni sem er kjörinn besti leikmaður ársins að mati IHF þrjú ár í röð.
Landi hans Emil Nielsen, markvörður Danmerkur og Spánarmeistara Barcelona, er einnig á listanum og sömuleiðis Ivan Martinovic, hægri skytta Króatíu og ungversku meistaranna í Veszprém.
Almenningur getur kosið leikmann ársins og opnar IHF fyrir kosningu á sunnudaginn 25. janúar. Hægt verður að kjósa til 10. febrúar.
