„Þetta eru gífurleg vonbrigði frá A til Ö. Varnar- og sóknarlega var þetta ekki nógu gott,“ sagði Ýmir Örn Gíslason í samtali við handbolta.is eftir jafntefli Íslands gegn Sviss í milliriðli 2 á Evrópumótinu í Malmö í Svíþjóð í dag.
Jafnteflið gerir Íslandi mun erfiðara um vik að komast í undanúrslit en það kemur endanlega í ljós í lokaumferðinni á morgun.
Sviss kippti Íslandi niður á jörðina – möguleikinn á undanúrslitum fjarlægist
Ýmir Örn sagði ekkert í leik Sviss hafa komið íslenska liðinu á óvart.
„Nei, það kom ekkert á óvart í þeirra leik. Ég hef enga skýringu akkúrat núna. Við vorum ógeðslega lélegir og erum ógeðslega svekktir út í okkur. Við áttum bara að gera miklu betur en það gekk ekki. Það er leiðinlegt, því miður.“
Þrátt fyrir slakan leik átti Ísland síðustu sóknina og hefði getað stolið sigrinum.
„Við vorum ennþá í séns. Við náðum ekki að nýta þarna síðustu 30 sekúndurnar sóknarlega. Það skiptir engu máli þegar við getum ekki einu sinni spilað vörn.
Það bara gekk ekkert. Við skorum samt 38 mörk þannig að auðvitað gekk sóknin. En að fá á sig 38 mörk er bara óásættanlegt,“ sagði Ýmir Örn Gíslason að lokum í samtali við handbolta.is.
