Í Handboltahöllinni á Handboltapassanum á mánudagskvöld var 14. umferð Olísdeildar kvenna gerð upp. Toppslag ÍBV og Vals var gerður sérstök skil og farið yfir frábæra frammistöðu tveggja Valskvenna, sem unnu mjög sterkan sigur í Vestmannaeyjum.
Þórey Anna Ásgeirsdóttir og Arna Karítas Eiríksdóttir áttu báðar sérlega góðan leik fyrir Val sem styrkti stöðu sína á toppi deildarinnar með sigrinum.
Rakel Dögg Bragadóttir, annar sérfræðinga Handboltahallarinnar, sparaði síst stóru orðin þegar hún ræddi um Þóreyju Önnu.
„Hún er svakalega öflug. Auðvitað erum við oft búin að tala um það. Mér finnst að við ættum öll að skoða hana því hún er rosalega öflugur slúttari. Hún er besti slúttari, ég skal taka Olísdeildir kvenna og karla saman.
Hún er frábær í slúttum. Hún er með allar týpur af skotum. Hún nær markmanninum úr stöðu og leggur hann á nær, getur sett hann upp í fjær, getur vippað yfir hausinn. Hún er með allt,“ sagði Rakel Dögg.
Umræðu um Þóreyju Önnu og Örnu Karítas má sjá í myndskeiðinu hér fyrir ofan.
