Engin bönd halda Kötlu Maríu og liðsfélögum

Katla María Magnúsdóttir og liðsfélagar hennar í Holstebro Håndbold halda sínu striki í dönsku B-deildinni. Liðið er áfram langefst á toppi deildarinnar eftir 34:21 stórsigur á Roskilde Håndbold á þriðjudagskvöld.

Holstebro er með 26 stig eftir 14 leiki, sex stigum fyrir ofan liðið í öðru sæti. Holstebro hefur unnið 13 leiki og tapað aðeins einum.

Katla María lét að sér kveða í leiknum á þriðjudagskvöld og skoraði þrjú mörk fyrir Holstebro, öll úr vítaköstum.

Efsta liðið fer beint upp í úrvalsdeildina og er Holstebro því í góðri stöðu þegar átta umferðir eru óleiknar í B-deildinni.