Eftir gagnrýni Dags Sigurðssonar landsliðsþjálfara Króatíu á framkvæmd Evrópumótsins í handknattleik hefur Handknattleikssamband Evrópu sent frá sér yfirlýsingu þar sem viðurkennt er að liðin sem koma frá Malmö til Jótlands í undanúrslitaleiki Evrópumótsins, Króatía og Ísland, sitji ekki við sama borð og Danmörk og Þýskaland. Það hafi legið fyrir hálfu ári fyrir mótið hvernig því yrði háttað og þar af leiðandi hafi það ekki átt að koma á óvart.
„Hins vegar skal tekið fram að á fyrri mótum hafa lið staðið frammi fyrir svipaðri dagskrá, til dæmis á EM 2018 sem haldið var í Króatíu,“ segir EHF og bætir við; „Nokkuð er um að lengri ferðalög á alþjóðlegum mótum séu ekki óalgeng. Á HM karla 2025 dvaldi Króatía í Karlovac en ferðaðist til Zagreb til að spila leiki sína.“
Nærri 60 km eru á milli Karlovac og Zagreb, um þriðjungi lengra en frá Silkeborg til Herning. Landslið Króatíu býr í Silkeborg.
Að endingu segir EHF að í mótslok verði skipulag mótsins skoðað með mótshöldurum og dreginn lærdómur af niðurstöðunum.
