Spánverjinn tekur einnig við félagsliði í Serbíu

Raúl González, spænskur þjálfari karlaliðs Serbíu, mun taka við stjórnartaumunum hjá serbneska félaginu RK Partizan fyrir næsta tímabil.

RK Partizan tilkynnti um ráðninguna á González í dag, þar sem kom um leið fram að Đorđe Ćirković muni láta af störfum að loknu yfirstandandi tímabili.

González tók við landsliði Serbíu síðastliðið sumar eftir að leiðir skildu hjá honum og París Saint-Germain. Þar hafði González starfað í sjö ár og unnið frönsku deildina sjö ár í röð.

Áður þjálfaði González RK Vardar frá Norður-Makedóníu og vann Meistaradeild Evrópu með liðinu árið 2017.