Handknattleikssamband Íslands hefur ákveðið vegna nýrrar bylgju kórónuveirufaraldursins hér á landi að fresta æfingabúðum kvennalandsliðsins og yngri landsliða sem fram áttu að fara um og upp úr komandi mánaðarmótum.
Eins verður frestað fjölliðamótum í 5., 6. og 7. flokki karla og kvenna sem ráðgert var að færu fram fyrstu helgina í október. Hvenær hægt verður að koma mótum yngri flokkana á dagskrá skýrist þegar á líður.
Þetta kemur fram í tilkynningu sem HSÍ sendi frá sér í morgun og er birt í heild sinni hér að neðan:
„Í ljósi þeirrar óvissu sem er í þjóðfélaginu vegna nýrrar bylgju Covid-smita og í þeim tilgangi að leggja lóð á vogarskál baráttunnar við útbreiðslu veirunnar hefur mótanefnd HSÍ og stjórn HSÍ tekið þá ákvörðun að fresta eftirtöldum viðburðum:
- A landslið kvenna, æfingavika 28. sept – 4. okt.
- Yngri landslið, æfingahelgi 30. sept – 4. okt.
- Fjölliðamót hjá KA, Þór og ÍBV í 5. -6. flokki eldri karla og kvenna, 2. – 4. október.
- Fjölliðamót hjá Haukum og Fjölni í 7. flokki karla og kvenna, 2.- 4. október
Á næstu dögum og vikum mun óvissuástandið vonandi skýrast og mun HSÍ vera í sambandi við aðildarfélögin hvað varðar þessa tilteknu viðburði og hvort og þá hvenær þeim verður komið inn í dagskrá vetrarins og hvaða áhrif þetta hafi á aðra leiki og keppnir.“
