- Auglýsing -
- Janus Daði Smárason skoraði tvö mörk í átta marka sigri Pick Szeged á ETO University Handball Team, 37: 29, í 23. umferð ungversku 1. deildarinnar í handknattleik í gær. Leikið var í Györi. Pick Szeged er sem fyrr í öðru sæti deildarinnar, sjö stigum á eftir One Veszprém þegar þrjár umferðir eru eftir.
- Reynir Þór Stefánsson var markahæstur hjá MT Melsungen með sjö mörk í 10 marka tapi liðsins fyrir Flensburg á heimavelli, 40:30, í 29. umferð þýsku 1. deildarinnar í gærkvöld. Arnar Freyr Arnarsson skoraði eitt mark fyrir Melsungen sem er í 7. sæti, 13 stigum á eftir Flensburg sem er í öðru sæti.
- Orri Freyr Þorkelsson skoraði eitt mark í uppgjöri Lissabon-liðanna Sporting og Benfica í úrslitakeppni portúgölsku 1. deildarinnar í gær, 40: 28. Stiven Tobar Valencia var ekki í leikmannahópi Benfica. Sporting er langefst í deildinni, hefur ekki tapað leik á keppnistímabilinu og virðist eiga meistaratitilinn vísan.
- Þorsteinn Leó Gunnarsson skoraði tvö mörk fyrir Porto í stórsigri á Águas Santas, 41:24, á útivelli í viðureign liðanna í úrslitakeppni um portúgalska meistaratitilinn í gærkvöld. Porto situr í öðru sæti á eftir Sporting.
- Auglýsing -
