Aðsend grein
Arnar Gunnarsson er þrautreyndur handknattleiksþjálfari og áhugamaður um velgengni og vöxt handknattleiks. Hann er þjálfari Neistans í Færeyjum. Fyrir neðan er önnur og síðari grein Arnars um breytingar á deildarkeppni Íslandsmótsins. Fyrri greinin birtist á handbolta.is í gær og er hlekkur á hana neðst.
[email protected]
Eins og áður segir legg ég til átta liða úrvaldeild (hér eftir Olís) og eins átta liða næst efstu deild (hér eftir Grill). Og svo þriðju deild, (hér eftir 3. d).
Í Olís ætti að spila þrefalda umferð. Samtals 21 leikur. Fjögurra liða úrslitakeppni og vinna þarf þrjá í hvorri umferð.
Lið í 8. sæti fellur og lið í 7. sæti spilar við liðið í 2. sæti Grilldeildar, einn leik, upp eða niður. Sá leikur ætti að fara fram á heimavelli liðsins úr Grillinu. Ef liðið í 7. sæti í Olís getur ekki unnið liðið í 2. sæti Grill á það skilið að falla.
Önnur hugmynd væri að liðin í 6. og 7. sæti efstu deildar leiki um að sleppa við þennan úrslitaleik. Og liðin í 2. og 3. sæti í næst efstu deild leiki um að komast í þennan leik.
Í Grill ætti að spila þrefalda umferð. Samtals 21 leikur. Liðið í efsta sæti fer beint upp. Liðið í 2. sæti spilar, eins og áður segir, við liðið í 7. sæti Olís.
Lið í 8. sæti fellur og lið í 7. sæti spilar við liðið í 2. sæti 3.d, einn leik, upp eða niður. Sá leikur ætti að fara fram á heimavelli liðsins úr 3.d. Ef liðið í 7.sæti í Grill getur ekki unnið liðið í 2.sæti 3.d á það skilið að falla. (Þessari úrslitakeppni má þó velta meira fyrir sér eftir því hvaða fyrirkomulag yrði á 3.d).
Hvað fyrirkomulag á 3.d varðar finnst mér ýmislegt koma til greina. Eins og staðan er í dag myndi ég draga þá ályktun að um félög eins og Vængi Júpiters, Kórdrengi og Berserki væri að ræða.
Stytta 3. flokk – endurvekja 2. flokk
Er svo ekki nauðsynlegt er að breyta flokkakerfinu?
Stytta þarf 3. flokk um eitt ár. Hafa flokkinn fyrir fyrstu tvö árin í í framhaldsskóla.
Fá inn 2. flokk aftur? Sem verður þá 2-3 ár.
Og út með Ú liðin?
Með þessu gef ég mér að líkur aukist á að fá inn Fylki (sem eru nú þegar í samstarfi við Fjölni), Þrótt, ÍH, Míluna, Hamrana, Kríu og fleiri jafnvel. Þarna væri vonandi kominn grundvöllur fyrir félög sem vilja æfa minna og fyrir venslafélög sem vilja byggja sig upp og verða á endanum sjálfbær, eða vonandi. Félög sem vilja meira en 3.d fara auðvitað upp í Grill.
Aukinheldur vil ég að slakað sé á reglum varðandi 3. d og keppnishús. Ef félög utan af landi sem dæmi vilja vera með lið í 3. á að leyfa þeim að vera með þó keppnishúsið standist ekki allar kröfur, og jafnvel þó vanti eitthvað örlítið upp á völlinn. Þetta gekk fyrir 30 plús árum, og ætti að ganga núna.
