Beðið eftir reglugerð ráðherra

„Við fórum bara vítt og breitt yfir sviðið og fórum yfir þá stöðu sem upp er komin. Hinsvegar voru engar ákvarðanir teknar á fundinum. Okkur þótti best að bíða og sjá hvað stendur í reglugerð heilbrigðisráðherra sem verður væntanlega birt í kvöld eða í fyrramálið,“ sagði Róbert Geir Gíslason, framkvæmdastjóri Handknattleikssambands Íslands í samtali við handbolta.is spurður hvort niðurstaða hafi verið af formannafundi HSÍ síðdegis.

Þar var rætt um þá stöðu sem komin er upp en sóttvarnarlæknir hefur mælt með í minnisblaði til heilbrigðisráðherra að íþróttafélög taki hlé frá æfingum og keppni næstu tvær vikur.