Íþróttastarf barna og unglinga verður leyft frá og með 18. nóvember samkvæmt því sem fram kom í viðtali við Svandísi Svavarsdóttur, heilbrigðisráðherra í hádegisfréttum Bylgjunnar í hádeginu í dag. Hún var þá að stíga út af ríkisstjórnarfundi þar sem farið var yfir tillögur sóttvarnalæknis um tilslakanir á sóttvarnareglum þegar núverandi reglur renna úr gildi fljótlega eftir næstu helgi.
Þetta var eina breytingin sem snýr að íþróttahreyfingunni eftir því sem kom fram í máli Svandísar.
Reglugerð ráðherra vegna tilslakana verður væntanlega birt fljótlega ásamt minnisblaði sóttvarnalæknis. Þá mun væntanlega vera nánar gerð grein fyrir hvort einhverjar takmarkanir verði á æfingum barna og unglinga, þ.e. varðandi snertingu og notkun áhalda og fleiri atriða.
Samkvæmt þessu þá verða æfingar fullorðinna, þ.e. meistaraflokka í handknattleik ekki heimilaðar fyrr en í fyrsta lagi 2. desember þegar næsta endurskoðun samkomutakmarkana tekur gildi.
Í ljósi orða ráðherra verður að teljast afar ósennilegt að þráðurinn verði tekinn upp á nýjan leik á Íslandsmótinu í handknattleik hjá fullorðnum fyrr en á nýju ári.
Uppfært kl. 14.05 – 14.nóv.: Ábending barst frá lesanda um að æfingar verði aðeins heimilar hjá börnum og unglingum á grunnskólaaldri. Þeir sem eru í 3. flokki og eldri verða áfram að sæta æfingabanni. Semsagt allir í fjórða flokki og þar fyrir neðan mega hefja æfingar á miðvikudag.
