Strákarnir í hlaðvarpsþættinum Handboltinn okkar voru að senda frá sér nýjan þátt þar sem þeir tóku spjall við formenn þriggja handknattleiksdeilda um stöðuna á deildarkeppnunum á Íslandi og hvernig þeir sæju fyrir sér framhaldið í mótamálum.
Fyrst ræddu þeir við Davíð Óskarsson formann handknattleiksdeildar ÍBV. Því næst fengu þeir Ásgeir Jónsson formann handknattleiksdeildar FH til sín en hann hefur sterkar skoðanir á því að það eigi bara að klára mótið þó að það þurfi að dragast fram í júlí. Ásgeir sagði drengjunum frá því að hann bíði enn eftir afsökunarbeiðni frá Handknattleiksdeild Gróttu eða Arnari Daða þjálfara meistaraflokks karla hjá Gróttu eftir aðdróttanir hans um að FH hafi verið að reyna að svindla á sóttvarnarreglum í tengslum við fyrirhugaða Evrópuleiki félagsins.
Síðastur á mælendaskrá hjá þeim félögum var Guðjón Björnsson formaður handknattleiksdeildar HK þar sem hann sagði frá því að kvennalið HK væri búið að missa Söru Sif Helgadóttur markvörð kvennaliðsins. Fram hafi ákveðið að kalla hana til baka úr láni. Það er eitthvað sem HK-ingar eru ósáttir með.
Þetta var síðasti þáttur drengjanna í Handboltinn okkar á þessu ári en þeir mæta svo aftur til leiks endurnærðir í upphafi nýs árs.
Hægt er að hlusta á þáttinn á hlekknum hér fyrir neðan.
