Handknattleiksmaðurinn Darri Aronsson og fyrrverandi leikmaður Hauka fer í aðgerð í París á föstudaginn þar sem settir verða naglar í aðra ristina. Darri ristarbrotnaði um miðjan júlí og hefur alls ekki jafnað sig ennþá þrátt fyrir að hafa síðan verið meira og minna í spelku og endurhæfingu. Gróandinn hefur langt í frá verið eins góður og vonir stóðu til. Fjórum mánuðum síðar má segja að Darri standi á byrjunarreit.
Eftir talsverðar vangaveltur meðal lækna franska liðsins US Ivry er ljóst að ekki verði komist hjá aðgerð þar sem ristin verður negld saman.
Hefur tekið sinn tíma
Darri staðfesti þessa niðurstöðu við handbolta.is í morgun. Sagðist hann vera ánægður með að loksins hafi verið tekin ákvörðun um hvað gera skuli. „Þetta hefur allt tekið sinn tíma eftir að afturkippur kom í batann í síðasta mánuði. Ég fór þá strax í MRI [innsk. – sneiðmynd] og röntgen eftir smellinn í ristinni í október. Læknar vildu vera vissir hvort ég þyrfti að fara í aðgerð eða ekki þar sem brotið er smá gróið en ekki nóg miðað við tímann sem er liðinn frá því hún brotnaði,“ sagði Darri sem hefur verið í sambandi við Brynjólf Jónsson bæklunarlækni hér á landi sem hefur aðstoðað mikið.
Ekki verður undan vikist
Fjórir mánuðir eru liðnir síðan brot kom í ristina. Þá var ekki talin þörf á aðgerð. Nú orðið fullljóst að ekki verði hjá henni komist.
Út á völlinn í febrúar
Darri segir að framundan sér full einbeiting á bata eftir aðgerðina. Vonast hann til að verða kominn á fulla ferð með US Ivry þegar þráðurinn verður tekinn upp í frönsku 1. deildinni að loknu heimsmeistaramótinu sem fram fer í janúar.
Darri samdi snemma á þessu ári við US Ivry til þriggja ára. Liðið vann sér sæti í efstu deildinni í Frakklandi í vor og situr í 14. sæti af 16 liðum deildarinnar með fimm stig eftir níu leiki.
Óðinn Þór Ríkharðsson handknattleiksmaður hjá Kadetten ristarbrotnaði um miðjan ágúst. Hann fór undireins í aðgerð og var kominn á fulla ferð níu vikum síðar eftir stífa endurhæfingu. Vonandi verður batinn hjá Darra jafn skjótur og góður.
