„Ég fann það strax í byrjun að mér leið vel á vellinum og strákarnir voru að leika upp á mig. Þar af leiðandi má segja að allt hafi smollið saman,“ sagði Arnór Snær Óskarsson sem átti frábæran leik með Val í gærkvöld gegn sænsku meisturunum Ystads í Evrópudeildinni í handknattleik í Origohöllinni. Arnór Snær skoraði 13 mörk í 18 skotum, vann vítaköst og gaf stoðsendingar og var svo sannarlega maður vallarins í þriggja marka tapi Vals, 29:32.
„Mig langar alltaf að taka af skarið og skora mörk. Ég get verið markagráðugur ef því er að skipta. Í þessum leik þá komu bara réttu færin til mín og ég greip tækifærið. Mér finnst gott að láta leikinn koma til mín og það gerðist að þessu sinni og það meira að segja snemma,“ sagði Arnór Snær ennfremur en hann skoraði m.a. fimm af fyrstu átta mörkum Vals í leiknum.
Sætara með sigri
„Ég hefði viljað vinna, það hefði gert þennan leik sætari og eftirminnilegri,“ sagði Arnór Snær sem var vonsvikinn yfir að tapa enda er hann eins og aðrir íþróttamenn í keppni til þess að vinna.
Upphafskafli síðari hálfleiks reyndist Valsmönnum erfiður og varð þess valdandi að Ystads náði fimm marka forskoti. Þrátt fyrir ákafar tilraunir síðasta stundarfjórðung leiksins þá tókst Arnóri Snæ og félögum ekki að jafna metin eða komast yfir þótt nokkrum sinnum hafi forskot sænsku meistaranna verið aðeins eitt mark.
Allt þarf að ganga upp
„Við fórum illa að ráði okkur í yfirtölu og nýttum ekki nógu mörg opin færi sem varð til þess að Svíarnir fengu hraðaupphlaup til að refsa okkur. Í svona leikjum er nauðsynlegt að halda niðri tæknifeilum og nýta tækifæri okkar betur til að eiga möguleika á að vinna.“
Evrópudeildin, 6. umferð: úrslit og staðan.
Tryggvi sýndi áræðni og þor
„Það tekur mikla orku frá okkur að vinna upp fimm marka forskot. En við reyndum og gerðum vel þótt það nægði ekki. Tryggvi Garðar [Jónsson] kom flottur inn í leikinn. Hann sýndi áræðni og þor, tók af skarið, nokkuð sem við þurfum á að halda þegar nokkra vantar í hópinn. Þá verða þeir sem taka við keflinu að þora að láta til sín taka. Það gerði Tryggvi svo sannarlega,“ sagði Arnór Snær.
Fjórir leikir eru eftir hjá Val í riðlakeppni Evrópudeildarinnar. Þeir fara fram fjóra þriðjudaga í febrúar. Sem stendur er Valur í fjórða sæti B-riðils og á möguleika að komast í 16-liða úrslit. Í þau komast fjögur efstu lið hvers riðils í keppninni.
Sigur í fyrsta leik í febrúar
„Fyrirfram vildi maður vinna þennan leik en það eru ennþá fjórir leikir eftir. Stefnan er að vinna þá alla. Fyrsti leikurinn í febrúar verður heimaleikur við Benidorm sem við verðum að vinna. Einnig getum við lagt PAUC í Origohöllinni. Mér fannst við vera nærri sigri í fyrri leiknum við PAUC,“ sagði þrettán marka maðurinn Arnór Snær Óskarsson í samtali við handbolta.is eftir leikinn í gærkvöld.
