Um miðjan dag taka leikmenn íslenska landsliðsins og starfsmenn liðsins saman föggur sínar í Hannover í Þýskalandi og fara áleiðis til flugvallar borgarinnar hvar þeir stíga upp í flugvél sem fer til Kastrupflugvallar í Kaupmannahöfn. Frá Kastrup heldur hópurinn áfram eins og leið liggur til Kristianstad í Svíþjóð þar sem fyrstu þrír leikir íslenska landsliðsins á heimsmeistaramótinu fara fram. Sá fyrsti verður á fimmtudagskvöld gegn Portúgal.
Seint í náttstað
Reikna má með að íslenski hópurinn verða ekki kominn í svefnstað í Kristianstad fyrr en seint í kvöld, jafnvel ekki fyrr en nokkuð eftir miðnætti.
Íslenski hópurinn hefur dvalið við góðan kost í Þýskalandi síðan á föstudaginn og tók m.a. þátt í tveimur vináttuleikjum við þýska landsliðið á laugardag og sunnudag. Annar leikurinn vannst, 31:30, en sá síðari tapaðist 33:31.
Ekkert babb komið í bátinn
Í gær var æft í keppnishöll í Hannover og þegar þetta er ritað að morgni þriðjudags er íslenska landsliðið á leiðinni á aðra æfingu áður en farið verður að huga að brottför frá Hannover. Ekki er vitað til þess að babb hafi komið í bátinn við undirbúninginn fyrir heimsmeistaramótið.
Æft í keppnishöllinni
Á morgun verður æft í Kristianstad Arena sem er hið besta mannvirki og rúmar m.a. um 5.000 áhorfendur í sæti. Kristianstad Arena hefur áður hýst leiki stórmóta í handknattleik, m.a. HM karla 2011 og EM kvenna 2016.
D-riðill (Kristianstad) 12. janúar: Ungverjaland – Suður Kórea, kl. 17. Ísland – Portúgal, kl. 19.30. 14. janúar: Portúgal – Suður Kórea, kl. 17. Ísland – Ungverjaland, kl. 19.30. 16. janúar: Suður Kórea – Ísland, kl. 17. Portúgal – Ungverjaland, kl. 19.30.
Leikjadagskrá HM – smellið hér.
