Tvö svokölluð Íslendingalið eiga sæti í undanúrslitum frönsku bikarkeppninnar eftir að Nantes, liðið sem Viktor Gísli Hallgrímsson landsliðsmarkvörður leikur með, tryggði sér sæti í undanúrslitum í gærkvöld með öruggum sigri á US Ivry, 35:26, á heimavelli. Í fyrrakvöld unnu Kristján Örn Kristjánsson, Donni, og félagar sér inn þátttökurétt í undanúrslitum með sigri á Nimes.
Eftir því sem næst verður komist stóð Viktor Gísli Hallgrímsson í marki Nantes í fyrri hálfleik í viðureigninni við Ivry í gær. Hann varði átta skot 40%. Nantes var með átta marka forskot eftir fyrri hálfleik, 18:10. Portúgalski landsliðsmarkvörðurinn Manuel Gaspar fékk að spreyta sig í síðari hálfleik í marki Nantes.
Darri Aronsson er ekki byrjaður að leika með US Ivry eftir ristarbrot.
Ljóst er að ekkert verður gefið eftir í undanúrslitum keppninnar. Auk Nantes og PAUC eiga PSG og Montpellier sæti í undanúrslitum. PSG vann Chartres í gærkvöld, 37:35.
