Afturelding hefur undirritað leikmannasamninga við sjö unga og efnilega leikmenn í handknattleik. Þeir eru við Harra Halldórsson, Hauk Guðmundsson, Aron Val Gunnlaugsson, Sigurjón Braga Atlason, Jökul Helga Einarsson, Daníel Bæring Grétarsson og Stefán Magna Hjartarson.
Leikmennirnir eru á 16. og 17. aldursári og spila í dag í þriðja flokki og flestir farnir að gera sig gildandi á æfingum með meistaraflokki auk þess að hafa allir tekið þátt í yngri landsliðum Íslands.
„Það er stefna Aftureldingar að byggja meistaraflokk sinn til framtíðar á yngri flokka starfi félagsins. Afturelding leggur mikinn metnað í þjálfun og umgjörð hjá yngri flokkum félagsins, með það að markmiði að geta boðið leikmönnum upp á umhverfi til að þróa sinn feril til framtíðar í Mosfellsbænum. Mikilvægt skref í því ferli er að bjóða leikmönnum upp á metnaðarfullt og traust umhverfi við að taka síðustu skrefin upp í meistaraflokkinn. Við höfum fulla trú á að þessir sjö leikmenn verði mikilvægir fyrir okkar íþróttastarf til framtíðar, bæði innan vallar jafnt sem utan vallar,“ segir m.a. í tilkynningu handknattleiksdeildar Aftureldingar.
