„Þorsteinn Leó hefur með frammistöðu sinni í vetur unnið fyrir því að vera valinn í hópinn. Einnig erum við að hugsa til framtíðar með því að gefa honum tækifæri,“ sagði Gunnar Magnússon annar þjálfara karlalandsliðsins í handknattleik um valið á landsliðinu fyrir leikina við Ísrael og Eistland í undankeppni EM sem fram fara 27. og 30. apríl. Meðal 17 leikmanna sem valdir voru er Þorsteinn Leó Gunnarsson, stórskyttan unga úr Aftureldingu.
„Það er mikilvægt fyrir framtíð landsliðsins að Þorsteinn Leó fái nasaþefinn að þessu sinni. Síðast völdum við Stiven [Tobar Valencia]. Hann stóð sig vel. Nú er röðin komin að Þorsteini Leó. Áætlanir okkar gera ráð fyrir að hann fái að minnsta kosti tækifæri í öðrum af tveimur leikjunum sem standa fyrir dyrum. Vonandi gengur það eftir,” sagði Gunnar.
Valsarinn Arnór Snær Óskarsson var 17. maður í hópnum í leikjunum við Tékka í síðasta mánuði en kom ekkert við sögu í leikjunum.
Ein breyting frá Tékkaleikjunum
Að öðru leyti er landsliðshópurinn skipaður sömu leikmönnum og tók þátt í síðustu leikjum landsliðsins með þeirri undantekningu að Viggó Kristjánssonar er meiddur og getur ekki verið með að þessu sinni. Ómar Ingi Magnússon hefur einnig verið frá vegna meiðsla síðan í lok janúar. Kristján Örn Kristjánsson, Donni, tekur sæti Viggós. Donni var síðast með landsliðinu á HM í janúar en var í veikindaleyfi þegar leikið var við Tékka í síðasta mánuði.
